Италийн Турин хотод энэ сарын 13-нд дэлхийн оюутны спортын Универсиад XXXII наадам хөшгөө нээх гэж байна.

10 өдөр үргэлжлэх тус наадамд 57 орны 2000 гаруй баг тамирчин спортын 11 төрлөөр өрсөлдөх юм. Харин манай улсаас уулын цана, уран гулгалт, гүйлтийн цана, шорт трейк, снөүборд гэсэн спортын таван төрөлд 20 хүний бүрэлдэхүүнтэй баг оролцохоор түрүүчээсээ Туриныг зорилоо. Тодруулбал, гүйлтийн цанын төрөлд эрэгтэйчүүдээс О.Золбаяр, А.Хүслэн, Б.Номин-Эрдэнэ, уулын цанаар О.Өсөх-Ирээдүй, А.Сондорбаяр, уран гулгалтаар О.Мишээл, снөүбордоор Г.Ганзориг, шорт трейкээр Г.Мөнх-Эрдэнэ, М.Борхүү, Э.Мөнх-Эрдэнэ, Б.Гэрэлтуяа нар Турин хотын цас, мөсөн замд уралдахаар бэлтгэлээ хангаж байна. Гүйлтийн цана болон шорт трейкийн тамирчинд тэмцээний бэлтгэлээ БНСУ болон Хандгайт дахь цанын баазад хангасан бол уулын цана, снөүбордчид “Скай Резорт”-д, О.Мишээл Японд бэлтгэлээ хангасан юм.

Дэлхийн оюутны спортын өвлийн Универсиад 2025 наадмын нээлтийн ёслол Италийн  Турин хотын 12350 хүний суудалтай “Иналпи арена”-д болно. Тус спортын байгууламжийг 2005 онд ашиглалтад оруулсан байдаг. Харин Турин хотын тухайд оюутны өвөл, зуны Универсиад наадмыг дөрөв дэх удаагаа хүлээн авч байна. Тодруулбал, 1959, 1970 онд зуны, 2007, 2025 онд өвлийн Универсиад наадмыг зохион байгуулж байна. Үүнээс гадна 2006 онд өвлийн олимпын хүлээн авсан түүхтэй. 

Эх сурвалж: Montsame.mn