Сагсан бөмбөгийн спортоос төрсөн анхны гавьяат Ц.Шаравжамц АНУ-ын Чикаго хот дахь “Монгол авьяас” академитай хамтран хүүхдийн шигшээ баг бүрдүүлж, АНУ-ын AAU хүүхдийн лигт оролцохоор болжээ.

Тэрбээр ярихдаа, “Манай тамирчид ганцаараа очоод өөр хүүхдүүдтэй нэг баг болж оролцоход хүндрэлтэй байна. Тиймээс бүтэн баг оролцуулахаар болсон юм. АНУ-ын Чикаго хотод байгаа “Монгол авьяас" акадамитай хамтран “Stars Academy” төслийг хэрэгжүүлэхээр болсон. Хүүхдүүдэд тавьж буй гол шаардлага нь авьяастай, ур чадвартай, хичээл зүтгэлтэй байх. Өөртөө итгэлтэй хүүхдүүдийг шалгаруулалтад урьж байна” гэв.

АНУ-ын дасгалжуулагч, скаутуудын нүдэнд өртөхөөр ур чадвар өндөртэй тамирчдыг сонгон шалгаруулж, тэдэнд боломж олгохыг зорьж байгааг Ц.Шаравжамц гавьяат онцлов. Бэлтгэл хийх, виз мэдүүлэх зэрэг олон асуудалтай учраас энэ сард хүүхдүүдээ шалгаруулж, “Монгол авьяас" академиас урилгаа авах аж.

Нийт дөрвөн насны ангилалд 10 тамирчин дөрвөн багтай явахаар төлөвлөжээ. Нэг сарын хугацаанд АНУ-д байх учраас нэг хүүхдээс гарах дундаж зардал 6000-7000 ам.доллар байхаар урьдчилан тооцоолсон байна. Тиймээс авьяастай хэрнээ санхүүгийн боломжгүй хүүхдүүдийг дэмжихийг албан байгууллага, бизнесмэнүүдэд уриалж байгаа юм. АНУ-д болдог AAU лигийн хамгийн том таван спортын нэг нь сагсан бөмбөг. Тиймээс хамгийн шилдэг тоглогчид, олон мужаар дамжин тоглодог учраас манай залуусын ур чадварыг гаднын мэргэжилтнүүд харах боломжтой юм байна.

Сонгон шалгаруулалт энэ сарын 14-нд “Үй Цай” сургуульд болох бөгөөд шалгаруулалтад 15-19 насныхан оролцоно. Улмаар шалгарсан хүүхдүүд долоо хоног бүрийн бямба, ням гарагт бэлтгэлд хамрагдах бөгөөд ирэх тавдугаар сарын 1-нээс лигтээ тоглож эхлэх ажээ.
эх сурвалж: montsame.mn